特別鳴謝並友情轉載自RoadShow路訊網
咁多隻香水，每個人嘅喜好都唔同，但有冇話邊隻特別唔特別呢？例如，如果我想揀一隻調情專用嘅香水，有冇一隻係你嘅favourite？假設有一日你心儀嘅對象約咗你去半島既Felix食晚飯，或者East Hotel嘅Sugar飲野，而你希望喺今次約會之後有下文…… Oops，唔係講緊當天晚上可能出現嘅劇烈運動，只係講緊你希望能夠用上一隻香水令佢對你瘋狂地迷戀，又或者達到催情嘅作用，咁你就要留意以下嘅內容。
一般嚟講，噴含白花嘅香水都能夠帶來迷暈同催情既效果。(老老實實，白花… 即係白色嘅花！) 最近我喺調香班上問同學對白花嘅味道有咩感覺？有位同學好快答我白花嘅味道好純潔。可惜， that's totally opposite in perfume making! 白花如果用喺香水入面係代表「誘情」，而唔係友情！咁有邊幾隻白花大家比較熟悉呢？茉莉花 (Jasmine)、百合花 (Lily)、晚香玉 (Tuberose)、槴子花 (Gardenia) 等都有「誘」人嘅功能。所以，白花一直以嚟都被大量用喺香水原料入面。而點解白花比較「誘」人嘅原因就同佢嘅天然成分有關，不過我先喺呢度賣個關子，將來有機會再同大家介紹。就係因為白花代表「誘惑」，市面上嘅香水喺推廣時都會強調呢一點，譬如說Christian Dior嘅J'adore香水，佢蘊含茉莉花同晚香玉嘅香氣，於是就用咗曾被《君子雜誌》譽為世界上最性感嘅女星查理絲·花朗做代言。再加上佢仿古希臘雙耳陶罐瓶身嘅設計，實際上非常似查理絲·花朗身材嘅黃金比例，更加突顯J’adore嘅誘人香調。
當然除咗J'adore之外，仲有好多香水都是用白花嚟做佢嘅主香調，例如Fragonard嘅Freesia，Frederic Malle嘅Carnal Flower同埋Hermes嘅Jour d'Hermes Gardenia。大家不妨今晚聞下你嘅香水有冇白花成分，如果你認為唔夠誘人嘅話，又係時候搵個藉口買香水嘞！
Facebook: www.facebook.com/mrperfumehk Website: www.perfume.hk